«Арзы къыз» эфсанеси Къырымтатар театрининъ санасында «Эки дюльбер сувгъа кетер» адынен гъайры баштан озь аятына башламакъ узьре. Драма эйлеми фольклор ве музыка джеэтлеринден зенгинлештирилип илериге, истикъбальге догърултылмакъта.

Оптимизм мевзусы баарь мотивлеринде озь аксини тапкъан. Аслында спектакль къадимий баарь байрамы олгъан Тепречнен башлана. Куреш, ихтиляф мевзулары мевсимлернинъ денъишювинен узвий шекильде багълы. Баарь илле къышнынъ къуветте къалмакъ ынтылышыны енъгени киби, къуруджы чалышкъыр кой халкъы да Арзы къызнынъ намусыны таптап устюнлик къазанаджакъ йыкъыджы нефисхорларны енъеджектир.

Арзы ве Асаннынъ бири-бирлерине севгилери, Бектемирнинъ ве денъиз айдутларынынъ хиянетликлери, койлю халкънынъ аятындан левхалары, койлюлернинъ ярдымлашувы, акъикъат ве намус огърунда курешмеге джесарети бир бутюнлик оларакъ бир макъсаткъа чалыша, яни умют бериджи джемиетнинъ муитини ортагъа къоя.